စလာမ်

Religious Terms for Activists & Journalists မှ
၁၄:၁၅၊ ၁၅ ဩဂုတ် ၂၀၁၇ နေ့က Jrc-admin (ဆွေးနွေး | ပံ့ပိုး) တည်းဖြတ်သည့်မူ

(ကွဲပြားမှု) မူဟောင်း | နောက်ဆုံး မူ (ကွဲပြားမှု) | ပိုသစ်သော တည်းဖြတ်မူ → (ကွဲပြားမှု)
ဤနေရာသို့သွားရန် - အ​ညွှန်း​, ရှာဖွေရန်

SALAM - SHALOM - PEACE - SHANTI - သန္တိသုခ[ပြင်​ဆင်​ရန်​]

စလာမ်၏တိုက်ရိုက်အဓိပ္ပါယ်မှာ ငြိမ်းအေးမှုဖြစ်ပါသည်။ အစ္စလာမ်သာသနာ၏အမည်မှာ စလာမ်ဆိုသောပုဒ်မှဆင်းသက်လာ၍ ရုပ်၊ နာမ်၊ လောကီ၊ လောကုတ်ငြိမ်းချမ်းရေးရရှိရန် ဘဝ တည်ဆောက်မှုပုံစံစံနစ်ဇယားဟု အဓိပ္ပါယ်ရပါသည်။ ကိုးကွယ်ခြင်းအမှန်တကယ်ခံထိုက်တော်မူသော အလ္လာဟ်၏အနန္တဂုဏ်တော်တို့အနက် ဂုဏ်တော်တစ်ပါးမှာ သန္တိသုခ၊ ငြိမ်းချမ်းရေး၏မူလအကြောင်း ခံဟု အနက်ထွက်ပါသည်။ တစ်နေ့ငါးကြိမ်ဝတ်ပြုခြင်းကို နိဂုံးချုပ်အဆုံးသတ် မေတ္တာပို့ရာတွင် သဗ္ဗေ သတ္တဝေနေယျတို့အား ငြိမ်းချမ်းပါစေဟု အငြိမ်းဓါတ်ဖြန့်ကျက်ရ၏။

လူတစ်ဦးနှင့်တစ်ဦးနှုတ်ဆက်ရာတွင် ‘စလာမ်’ ငြိမ်းချမ်းပါစေဟုဆိုရ၍ တန်ပြန်၍ငြိမ်းပါစေကြောင်း ဆုတောင်းမေတ္တာပို့ရပါသည်။

မွတ်ဆလင်တို့သည် အသက်ရှုသည်နှင့်အမျှ ငြိမ်းချမ်းအေးမြမှု၏အကြောင်းခံ အလ္လာလ်ကို နှလုံးသွင်းဉာဏ်ပွားနေရမှာဖြစ်သော်လည်း လူ၏စိတ်ကိုပြောင်းလဲနိုင်သော တစ်နေ့တာ၏ (၅)ကြိမ် သောအချိန်ပိုင်းတို့တွင် စုပေါင်း၍ ဆွလာသ်ဘာဝနာပွားရပါ၏။ ထိုဘာဝနာကို မိမိ၏လကျာ်၊ လက်ဝဲတို့ လှည့်၍ ‘စလာမ်’ မေတ္တာပို့၍ အဆုံးသတ်ရပါသည်။ သမ္မာကျမ်းတွင်လာရှိသော ‘ငြိမ်းချမ်း ရေးတည် ဆောက်သူတို့အပေါ်ကောင်းချီးမင်္ဂလာတို့ခညောင်းလျက်ရှိ၏ အဘယ်ကြောင့်ဟူမူ သူတို့ အား ဘုရားသခင်၏သားတော်များဟုခေါ်ဆိုခြင်းခံရပေအံ့’ ဟူသည် ကျမ်းချက်သည်အစ္စလာမ်နှင့် မွတ်ဆလင် တို့လိုက်နာရမည့်တရားပင်ဖြစ်ပါသည်။

ဂျန္န်သ်- ကုသိုလ်ကောင်းမှုပြုသူတို့အလ္လာလ့်ဂရုဏာတော် (Grace) ဖြင့် စံစားရမည့် သန္တိသုခ၊ အမတ၊ လောကုတ္တရာ စခန်းဖြစ်ပါသည်။ သန့်စင်မှုနှင့် အေးချမ်းမှုကို ဥယျာဉ်၊ စမ်းချောင်း ရေတို့ဖြင့် သင်္ကေတဆောင်ထား၏။ ဂျန္န်သ်တွင်ရှိသည့် ဓမ္မစခန်းအဆင့်ဆင့်တို့အား သစ်သီးဝလံ၊ စမ်းချောင်း တို့၏ ရနံ့တို့ဖြင့်လည်း သင်္ကေတဆောင်ထားပါသည်။ ဂျန္န်သ်၏ အနှစ်သာရမှာ ပကတိသန့်စင်သည့် ငြိမ်းချမ်းမှုဖြစ်၏။ ဆင်းရဲခပ်သိမ်း၊ ဒုက္ခခပ်သိမ်းကြောင့် ကြ ခပ်သိမ်း ကင်းငြိမ်းရာကို ပမာ ဆောင်၍ တင်စားဖော်ပြရာတွင် လောကီအာရုံ၊ ရုပ် ပစ္စည်း စသည်တို့ကို ပုံပမာဆောင်၍ ခိုင်းနှိုင်းဖော်ကြူးထားသော်လည်း ဂျန္နသ်၏ ချမ်းသာမှု မှာ မည်သည့်လူ၊ နတ်၊ ဗြဟ္မာတို့မှ မခံစား၊ မစံစားဘူးသော ချမ်းသာဟူ၍လည်းကောင်း၊ လိုချင်သမျှရမည်ဟူသော ကောင်းသတင်းမှာ အလိုကုန်သည်စခန်းကို ဆိုလိုခြင်းဖြစ်သည် ဟူ၍လည်းကောင်း၊ ကုန်အာန် ကျမ်းတော်မြတ်နှင့် မဟာတမန်တော်မြတ်သြဝါဒတော်တို့တွင် တိတိပပဖော်ပြထားပါသည်။ ဥပမာ - (ကုန်အာန် ၁၃:၃၅ ၊ ၄၇:၁၅ ၊ ၃၂:၁၇ ။ ဘူခါရီသြဝါဒကျမ်း ၅၉:၈)။ ဂျန္နသ်ဟူသည့် ဝေါဟာရသည့် ဂျန်ဗြဲဆိုသော ရင်းမြစ် Root Word မှ ဆင်းသက်လာပြီး၊ အာရုံတို့ဖြင့် ထိတွေ့၍မရနိုင်အောင် ဖုံးလွှမ်းခြင်းဟု အဓိပ္ပါယ်ရ၏။

ဂျန္နသ်တွင် ရှိမည်ဟူသော နတ်သမီးကညာပျို ‘ဟူ(ရ်)’ “HUR” နှင့်ပတ်သက်၍ ရှင်းလင်းရန်လိုပါသည်။ ဟူ(ရ်) HUR သည် ဟဝါရီ HAWARI ဆိုသည့် ရင်းမြစ်စကား Root Word မှ ဆင်း သက်လာပါသည်။ အဖို၊ ပုလ္လိင် MASCULINE GENDER တွင် ‘အဟ်ဝါ’ AHWAR ဟုခေါ်ပြီး အမ၊ ဣတ္ထိလိင် FEMININE GENDER တွင် HAURA ‘ဟောင်ရာ’ ဟုခေါ်ပါသည်။ ‘ဟဝါရီ’ ၏ အဓိပ္ပါယ်မှာ ‘ပကတိသန့်စင်မှုနှင့် မွန်မြတ်သည့်မိတ်ဆွေမွန်’ ဟု အဓိပ္ပါယ် ရပါသည်။ ယေရှုခရစ်တော် Jesus Christ တပည့်ကြီးတို့အား ကျမ်းမြတ်ကုန်အာန်တွင် ဟဝါရီ HAWARI ဟုခေါ်ထားပါသည်။ မဟာတမန် တော်မြတ်ကြီး၏ သြဝါဒတော်တို့တွင် ဟဝါရီကို မဟာ လူသား မြတ်တမန်တို့၏ သာဝကကြီးကို ရည်ညွှန်း၍ သုံးနှုန်းထားပါသည်။ ဂျန္နသ်သို့ သူတော် ကောင်းတရား ကျင့်ကြံအားထုတ်သည့်အမျိုးသမီး၊ အမျိုးသားတို့ ခွဲခြားမှုမရှိဘဲ တန်းတူညီမျှ စံမြန်း ရမည်ဖြစ်ပါသည်။ (ကုန်အာန် ၄၀:၄၀ ။ ၄:၁၂၄ ။ ၁၆:၉၇ ။ ၃:၁၉၄ ။ ၂:၃၅ ။ ၃၆:၅၆ ။ ၄၀:၈ ။ ၄၃:၇၀)

အနှစ်ချုပ်ဆိုရပါမူ ဂျန္နသ်သည် ပကတိသန့်စင်၊ အေးချမ်းပြီး အိုခြင်း၊ နာခြင်း၊ သေခြင်းကင်းရာ၊ ဆင်းရဲခပ်သိမ်း ဒုက္ခခပ်သိမ်းကြောင့်ကြခပ်သိမ်းကင်းငြိမ်းရာ ဓမ္မစခန်းဖြစ်ပါသည်။ ထိုစခန်းတွင် တောင့်တ၊ ကြောင့်ကြမှု စိုးစင်းမျှ မကပ်ညှိကြသော အလိုကုန်၍ အနတ္တဉာဏ်စိုက်နေသည့် အမျိုးသား အမျိုးသမီးတို့ အရှင့်အလိုတော်ဖြင့် စံစားရမည်။ ဂျန္နသ်၏ ချမ်းသာမှာ မည်သည့်လူ၊ နတ်၊ ဗြဟ္မာ တို့မှ မစံစားဖူးသည့် အာရုံလွန် လောကုတ္တရာအငြိမ်းဓာတ်ဖြစ်ပါသည်။